琴晚掛住打機，攪到今朝早訓晏左，於是求求其其換好衫就跑住去返學。心急如焚既我一直狂禁個Lift門制，雖然明知禁多幾下都唔會令到架Lift即刻以9秒9升上黎，但本能反應仍然想禁多幾下，奢求架Lift真係比平時快幾秒。直至Lift門開左，我一直急燥既心同身體，都突然間靜止左落黎，因為Lift入面有一個女仔，一個我熟識既女仔。
Lift入面只有我同佢，我地大家都無出聲，一直沉默住，大家既視線都望住Lift入面既樓層顯示版。32樓……29樓……26樓……當樓層不斷向下時，我腦海就不斷諗返起以前，諗起『佢』。
依個女仔叫阿娜，其實佢全名好大陸，好平凡，仲好難聽，就咁讀阿娜都覺得有D怪。不過正正就係因為佢個名咁怪雞，就算過左十幾年後既今日，我都記得佢個名。
依個女仔係我好細過個陣一位好好既朋友，又可以話係童年玩伴。大約係我小學一年級，個陣仲住係安置區，仲未上公屋。由於女仔發育既時間比男仔早，所以阿娜既身高比當時既我係高好多好多……所以佢成日笑我細粒過佢，個陣我都幾孩子氣，竟然比一個女仔笑我細粒，於是嬲嬲地大大聲咁同佢講左一句:
“如果有一日我高過你既話!!!!你就要嫁比我!!!”
我唔知點解當時會爆左依句說話出黎，雖然只係小學一年級，但個陣既心一直對阿娜都有好感，又可能個陣玩得老公老婆既煮飯仔遊戲，依家都諗唔到個陣點解咁講。而阿娜當時聽到之後，即刻禁住我個頭笑笑口咁講:『哈哈!! 好呀!!我等你同我求婚!!』
後來大家都升上公屋，雖然住同一棟樓，不過大家所讀既小學就唔一樣，自此就無再聯絡。望住部Lift顯示樓層慢慢向下，雖然只係短短數十秒，但令我諗下點解一個曾經好好既朋友，因為大家圈子唔同左就從此無再聯絡呢?
即使見到面就如同陌路人一樣，連招呼都唔會打，唔通我地細細過相處既回憶都係假既?
係佢腦入面仲有冇我存在既影子? 仲記唔記得我係邊個呢?
除左阿娜之外，再諗下自己已經好耐冇同中學同學聯絡。好似我昔日既好朋友阿偉， 我地由小學到中學都一齊玩， 一齊返學，一齊放學。最巧合既係，佢係住我格離屋。但我地竟然試過可以一年內都唔會點傾計，有時搭Lift個陣見到面，都只係寒喧幾句，次次都會講
“喂! 好耐無見你啦!”
“搵日出黎食飯啦!”
所謂既搵日出黎食飯只係客套說話，係完全無下文。而事實上，我發覺自己慢慢失去左好多昔日好重要既朋友同兒時既玩伴。好似某某人，有日係街到見佢抱住個BB，我仲笑問:『係邊到搵個BB返黎玩呀?』
佢笑說:『玩你個頭!我個仔黎架!』
個下覺得好驚訝，昔日既同班同學竟然無啦啦結左婚仲生埋個仔。不過，其實諗深一層都唔係無啦啦，只係我從來都無搵過對方。
或許大家圈子唔同，重視程度都唔同。有人會認為某D朋友係人生既"過客" 唔需要刻意KEEP住，不過我既睇法其實我好想KEEP住同所有朋友既關係，但卻有一種無力感。
口講珍惜好易，但做起上黎好難。又或者明知珍惜，但相處期間從來無諗過大家既關係會淡同埋完結，直到大家既關係真係疏遠左既時侯，已經後悔莫及，怨恨自己點解唔盡力維繫大家既感情，要到失去時才學懂咩叫『珍惜』。
人生都過左1/4，都活左廿幾年人，識到好多朋友。但有幾多個可以維持長久? 有幾多個出黎聚會係發自內心而唔係例行公事黎應酬我地呢?
會唔會數年或數十年後，我地係街到見面時，隨時如同陌路人一樣，唔會叫大家呢?
依個時侯，部Lift到左最下層，我同依位女仔靜靜咁行出去，背對背咁各自各行唔同既方向離去。我行左幾步路之後，我忍唔住轉身望住佢背影，輕輕說一句:
『 我已經高過你。』
Search